ہم پر جفا سے ترک وفا کا گماں نہیں ہم پر جفا سے ترک وفا کا گماں نہیں
اک چھیڑ ہے وگرنہ مراد امتحاں نہیں
کس منہ سے شکر کیجئے اس لطف خاص کا
پرسش ہے اور پاے سخن درمیاں نہیں
ہم کو ستم عزیز ستم گر کو ہم عزیز
نا مہرباں نہیں ہے اگر مہرباں نہیں
بوسہ نہیں نہ دیجیے دشنام ہی سہی
آخر زباں تو رکھتے ہو تم گر دہاں نہیں
ہر چند جاں گدازی قہر و عتاب ہے
ہر چند پشت گرمی تاب و تواں نہیں
جاں مطرب ترانۂ ہل من مزید ہے
لب پردہ سنج زمزمۂ الاماں نہیں
خنجر سے چیر سینہ اگر دل نہ ہو دو نیم
دل میں چھری چبھو مژہ گر خونچکاں نہیں
ہے ننگ سینہ دل اگر آتش کدہ نہ ہو
ہے عار دل نفس اگر آذر فشاں نہیں
نقصاں نہیں جنوں میں بلا سے ہو گھر خراب
سو گز زمیں کے بدلے بیاباں گراں نہیں
کہتے ہو کیا لکھا ہے تری سر نوشت میں
گویا جبیں پہ سجدۂ بت کا نشاں نہیں
پاتا ہوں اس سے داد کچھ اپنے کلام کی
روح القدس اگرچہ مرا ہم زباں نہیں
جاں ہے بہائے بوسہ ولے کیوں کہے ابھی
غالبؔ کو جانتا ہے کہ وہ نیم جاں نہیں
جس جا کہ پائے سیل بلا درمیاں نہیں
دیوانگاں کو واں ہوس خانماں نہیں
گل غنچگی میں غرقۂ دریائے رنگ ہے
اے آگہی فریب تماشا کہاں نہیں
کس جرم سے ہے چشم تجھے حسرت قبول
برگ حنا مگر مژۂ خوں فشاں نہیں
ہر رنگ گردش آئنہ ایجاد درد ہے
اشک سحاب جز بہ وداع خزاں نہیں
جز عجز کیا کروں بہ تمنائے بے خودی
طاقت حریف سختیٔ خواب گراں نہیں
عبرت سے پوچھ درد پریشانیٔ نگاہ
یہ گرد وہم جز بسر امتحاں نہیں
برق بجان حوصلہ آتش فگن اسدؔ
اے دل فسردہ طاقت ضبط فغاں نہیں
Poet: مرزا غالب
Hum Par Jafa Se Tark-e-wafa Ka Guman Nahin
hum par jafa se tark-e-wafa ka guman nahin
ek chheD hai wagarna murad imtihan nahin
kis munh se shukr kijiye is lutf-e-KHas ka
pursish hai aur pa-e-suKHan darmiyan nahin
hum ko sitam aziz sitamgar ko hum aziz
na-mehrban nahin hai agar mehrban nahin
bosa nahin na dijiye dushnam hi sahi
aaKHir zaban to rakhte ho tum gar dahan nahin
har-chand jaan-gudazi-e-qahr-o-itab hai
har-chand pusht-e-garmi-e-tab-o-tawan nahin
jaan mutrib-e-tarana-e-hal-mim-mazid hai
lab parda-sanj-e-zamzama-e-al-aman nahin
KHanjar se chir sina agar dil na ho do-nim
dil mein chhuri chubho mizha gar KHun-chakan nahin
hai nang-e-sina dil agar aatish-kada na ho
hai aar-e-dil nafas agar aazar-fishan nahin
nuqsan nahin junun mein bala se ho ghar KHarab
sau gaz zamin ke badle bayaban giran nahin
kahte ho kya likha hai teri sarnawisht mein
goya jabin pe sajda-e-but ka nishan nahin
pata hun us se dad kuchh apne kalam ki
ruhul-qudus agarche mera ham-zaban nahin
jaan hai baha-e-bosa wale kyun kahe abhi
'ghaalib' ko jaanta hai ki wo nim-jaan nahin
jis ja ki pa-e-sail-e-bala darmiyan nahin
diwanagan ko wan hawas-e-KHanman nahin
gul ghunchagi mein gharqa-e-dariya-e-rang hai
ai aagahi fareb-e-tamasha kahan nahin
kis jurm se hai chashm tujhe hasrat qubul
barg-e-hina magar mizha-e-KHun-fishan nahin
har rang-e-gardish aaina ijad-e-dard hai
ashk-e-sahab juz ba-wida-e-KHizan nahin
juz ijz kya karun ba-tamanna-e-be-KHudi
taqat harif-e-saKHti-e-KHwab-e-giran nahin
ibrat se puchh dard-e-pareshani-e-nigah
ye gard-e-wahm juz basar-e-imtihan nahin
barq-e-ba-jaan-e-hausla aatish-fagan 'asad'
ai dil-fasurda taqat-e-zabt-e-fughan nahin
