Faiz Ahmed Faiz Ghazals Collection
پھر آئینۂ عالم شاید کہ نکھر جائے
غزل
پھر آئینۂ عالم شاید کہ نکھر جائے
پھر اپنی نظر شاید تا حد نظر جائے
صحرا پہ لگے پہرے اور قفل پڑے بن پر
اب شہر بدر ہو کر دیوانہ کدھر جائے
خاک رہ جاناں پر کچھ خوں تھا گرو اپنا
اس فصل میں ممکن ہے یہ قرض اتر جائے
دیکھ آئیں چلو ہم بھی جس بزم میں سنتے ہیں
جو خندہ بہ لب آئے وہ خاک بسر جائے
یا خوف سے در گزریں یا جاں سے گزر جائیں
مرنا ہے کہ جینا ہے اک بات ٹھہر جائے
phir aaina-e-alam shayad ki nikhar jae
phir apni nazar shayad ta-hadd-e-nazar jae
sahra pe lage pahre aur qufl paDe ban par
ab shahr-badar ho kar diwana kidhar jae
KHak-e-rah-e-jaanan par kuchh KHun tha girau apna
is fasl mein mumkin hai ye qarz utar jae
dekh aaen chalo hum bhi jis bazm mein sunte hain
jo KHanda-ba-lab aae wo KHak-basar jae
ya KHauf se dar-guzren ya jaan se guzar jaen
marna hai ki jina hai ek baat Thahar jae
جو رکے تو کوہِ گراں تھے ہم، جو چلے تو جاں سے گزر گئے
غزل
نہ گنواؤ ناوکِ نیم کش، دلِ ریزہ ریزہ گنوادیا
جو بچے ہیں سنگ سمیٹ لو، تنِ داغ داغ لٹادیا
مرے چارہ گر کو نوید ہو، صفِ دشمناں کو خبر کرو
وہ جو قرض رکھتے تھے جان پر، وہ حساب آج چکادیا
کرو کج جبیں پہ سرِ کفن، مرے قاتلوں کو گماں نہ ہو
کہ غرورِ عشق کا بانکپن، پسِ مرگ ہم نے بھلادیا
اُدھر ایک حرف کے کشتنی، یہاں لاکھ عذر تھا گفتنی
جو کہا تو ہنس کے اڑادیا، جو لکھا تو پڑھ کے مٹادیا
جو رکے تو کوہِ گراں تھے ہم، جو چلے تو جاں سے گزر گئے
رہِ یار ہم نے قدم قدم تجھے یادگار بنادیا
