Kiye Aarzu Se Paiman Jo Maal Tak Na Pahunche
کیے آرزو سے پیماں جو مآل تک نہ پہنچے
غزل
کیے آرزو سے پیماں جو مآل تک نہ پہنچے
شب و روز آشنائی مہ و سال تک نہ پہنچے
وہ نظر بہم نہ پہنچی کہ محیط حسن کرتے
تری دید کے وسیلے خد و خال تک نہ پہنچے
وہی چشمۂ بقا تھا جسے سب سراب سمجھے
وہی خواب معتبر تھے جو خیال تک نہ پہنچے
ترا لطف وجہ تسکیں نہ قرار شرح غم سے
کہ ہیں دل میں وہ گلے بھی جو ملال تک نہ پہنچے
کوئی یار جاں سے گزرا کوئی ہوش سے نہ گزرا
یہ ندیم یک دو ساغر مرے حال تک نہ پہنچے
چلو فیضؔ دل جلائیں کریں پھر سے عرض جاناں
وہ سخن جو لب تک آئے پہ سوال تک نہ پہنچے
kiye aarzu se paiman jo maaal tak na pahunche
shab-o-roz-e-ashnai mah o saal tak na pahunche
vo nazar baham na pahunchi ki muhit-e-husn karte
tiri diid ke vasile khad-o-khal tak na pahunche
vahi chashma-e-baqa tha jise sab sarab samjhe
vahi khvab mo’tabar the jo khayal tak na pahunche
tira lutf vajh-e-taskin na qarar sharah-e-gham se
ki hain dil men vo gile bhi jo malal tak na pahunche
koi yaar jaan se guzra koi hosh se na guzra
ye nadim-e-yak-do-saghar mire haal tak na pahunche
chalo ‘faiz’ dil jalaen karen phir se arz-e-janan
vo sukhan jo lab tak aae pe saval tak na pahunche
