Ghar Jab Bana Liya, Tere Dar Par Kahe Beghair
گھر جب بنا لیا ترے در پر کہے بغیر
جانے گا اب بھی تو نہ مرا گھر کہے بغیر
کہتے ہیں جب رہی نہ مجھے طاقت سخن
جانوں کسی کے دل کی میں کیونکر کہے بغیر
کام اس سے آ پڑا ہے کہ جس کا جہان میں
لیوے نہ کوئی نام ستم گر کہے بغیر
جی میں ہی کچھ نہیں ہے ہمارے وگرنہ ہم
سر جائے یا رہے نہ رہیں پر کہے بغیر
چھوڑوں گا میں نہ اس بت کافر کا پوجنا
چھوڑے نہ خلق گو مجھے کافر کہے بغیر
مقصد ہے ناز و غمزہ ولے گفتگو میں کام
چلتا نہیں ہے دشنہ و خنجر کہے بغیر
ہر چند ہو مشاہدۂ حق کی گفتگو
بنتی نہیں ہے بادہ و ساغر کہے بغیر
بہرا ہوں میں تو چاہیئے دونا ہو التفات
سنتا نہیں ہوں بات مکرر کہے بغیر
غالبؔ نہ کر حضور میں تو بار بار عرض
ظاہر ہے تیرا حال سب ان پر کہے بغیر
Ghar jab bana liya, tere dar par kahe beGhair
Jaanega ab bhi tu na mera ghar kahe beGhair
Kahte hain, jab rahi na mujhe taqat-e-sukhan
JanuN kisi k dil ki main kyunkar kahe beGhair
Kaam us se a paRa hai K jisaka jahan mein
Leway na koi naam sitamagar kahe beGhair
Ji mein hi kuch nahi hai hamare wagarna ham
Sar jaaye ya rahe, na rahen par kahe beGhair
ChoRunga main na us but-e-kafir ka poojana
ChoRe na khalq go mujhe kafir kahe beGhair
Maqsad hai naz-o-Ghamza wale guftagu mein kaam
Chalta nahi hai, dashna-o-khanjar kahe beGhair
Har chand ho mushahida-e-haq ki guftagu
Banti nahi hai bada-o-saaGhar kahe beGhair
Behra hun main to chahiye duna ho iltefaat
Sunta nahi hun baat muqarrar kahe beGhair
‘Ghalib’ na kar huzur mein tu bar-bar arz
Zahir hai tera hal sab un par kahe beGhair
Mirza Ghalib
