 |
| Hum Bhi Shair The Kabhi Jaan-E-Sukhan Yaad Nahin Ahmed Faraz |
ہم بھی شاعر تھے کبھی جان سخن یاد نہیںPoet: احمد فراز
ہم بھی شاعر تھے کبھی جان سخن یاد نہیں
تجھ کو بھولے ہیں تو دل داریٔ فن یاد نہیں
دل سے کل محو تکلم تھے تو معلوم ہوا
کوئی کاکل کوئی لب کوئی دہن یاد نہیں
عقل کے شہر میں آیا ہے تو یوں گم ہے جنوں
لب گویا کو بھی بے ساختہ پن یاد نہیں
اول اول تو نہ تھے واقف آداب قفس
اور اب رسم و رہ اہل چمن یاد نہیں
ہر کوئی ناوک و ترکش کی دکاں پوچھتا ہے
کسی گاہک کو مگر اپنا بدن یاد نہیں
وقت کس دشت فراموشی میں لے آیا ہے
اب ترا نام بھی خاکم بدہن یاد نہیں
یہ بھی کیا کم ہے غریب الوطنی میں کہ فرازؔ
ہم کو بے مہرئ ارباب وطن یاد نہیں
ham bhi shair the kabhi jan-e-sukhan yaad nahin
tujh ko bhule hain to dil-dari-e-fan yaad nahin
dil se kal mahv-e-takallum the to maalum hua
koi kakul koi lab koi dahan yaad nahin
aql ke shahr men aaya hai to yuun gum hai junun
lab-e-goya ko bhi be-sakhta-pan yaad nahin
avval avval to na the vaqif-e-adab-e-qafas
aur ab rasm-o-rah-e-ahl-e-chaman yaad nahin
har koi navak o tarkash ki dukan puchhta hai
kisi gahak ko magar apna badan yaad nahin
vaqt kis dasht-e-faramoshi men le aaya hai
ab tira naam bhi khakam-ba-dahan yaad nahin
ye bhi kya kam hai gharib-ul-vatani men ki ‘faraz’
ham ko be-mehri-e-arbab-e-vatan yaad nahin
Poet: احمد فراز
